ரஷ்யாவில் உக்ரைன் ட்ரோன் தாக்குதல்: இந்தியர் உட்பட 4 பேர் உயிரிழப்பு

ரஷ்யாவின் தலைநகர் மாஸ்கோ உள்ளிட்ட பகுதிகளில் இன்று அதிகாலை நடைபெற்றதாக கூறப்படும் உக்ரைன் ட்ரோன் தாக்குதலில், இந்திய தொழிலாளி ஒருவரைச் சேர்த்து மொத்தம் 4 பேர் உயிரிழந்துள்ளதாக தகவல்கள் வெளியாகியுள்ளன. மேலும் பலர் காயமடைந்துள்ளனர்.

ரஷ்ய அதிகாரிகள் வெளியிட்ட தகவலின்படி, இரவு முழுவதும் பல பகுதிகளை குறிவைத்து ட்ரோன் தாக்குதல்கள் நடத்தப்பட்டதாக கூறப்படுகிறது. இதில் உயிரிழந்தவர்களின் முழுமையான விவரங்கள் இன்னும் அதிகாரப்பூர்வமாக வெளியிடப்படவில்லை.

இதுகுறித்து இந்திய தூதரகம் வெளியிட்ட தகவலில், தாக்குதலில் இந்திய தொழிலாளி ஒருவர் உயிரிழந்ததையும், மேலும் மூன்று இந்தியர்கள் காயமடைந்ததையும் உறுதிப்படுத்தியுள்ளது. சம்பவத்திற்குப் பிறகு தூதரக அதிகாரிகள் மருத்துவமனைக்கு சென்று காயமடைந்தவர்களை சந்தித்து தேவையான உதவிகளை செய்து வருவதாகவும் தெரிவிக்கப்பட்டுள்ளது.

இந்த சம்பவம் தொடர்பாக இரங்கல் தெரிவித்துள்ள இந்திய தூதரகம், உள்ளூர் நிர்வாகத்துடன் இணைந்து இந்தியர்களுக்கு தேவையான அனைத்து உதவிகளும் வழங்கப்படுகின்றன என்று கூறியுள்ளது.

இந்நிலையில், ரஷ்யாவின் பல்வேறு பகுதிகளில் நடந்த தாக்குதல்களில் மொத்தம் 4 பேர் உயிரிழந்ததுடன் 12 பேர் வரை காயமடைந்துள்ளதாக அந்நாட்டு அதிகாரிகள் தெரிவித்துள்ளனர்.

மறுபுறம், உக்ரைன் அதிபர் Volodymyr Zelenskyy இந்த தாக்குதல்கள் நடைபெற்றதை உறுதிப்படுத்தியதாகவும், அவை தங்களது பாதுகாப்பு நடவடிக்கைகளின் ஒரு பகுதியாகும் என்றும் கூறியதாக தகவல்கள் வெளியாகியுள்ளன.

— nexttamil.com