“Gen Z Kids” யாரு இவர்கள்?
இன்றைய டிஜிட்டல் உலகில் அதிகமாக பேசப்படும் வார்த்தைகளில் ஒன்று தான் “Gen Z Kids”. சமூக வலைதளங்களில் இருந்து வேலை செய்யும் முறை வரை பல மாற்றங்களை கொண்டு வந்துள்ள இந்த தலைமுறை பற்றி அனைவரும் அறிந்து கொள்ள ஆர்வம் காட்டி வருகின்றனர்.
“Gen Z” என்பது பொதுவாக 1997 முதல் 2012 வரை பிறந்தவர்களை குறிக்க பயன்படுத்தப்படும் பெயராகும். இணையம், ஸ்மார்ட்போன், சமூக வலைதளங்கள் ஆகியவற்றுடன் வளர்ந்த முதல் தலைமுறை என்பதால், இவர்கள் சிந்திக்கும் விதமும், வாழ்க்கை அணுகுமுறையும் முந்தைய தலைமுறைகளை விட மாறுபட்டதாக பார்க்கப்படுகிறது.
இந்த தலைமுறையினர் தொழில்நுட்பத்தை மிகவும் வேகமாக கற்றுக்கொள்ளும் திறன் கொண்டவர்கள். படிப்பு, வேலை, பொழுதுபோக்கு, ஷாப்பிங் என அனைத்தையும் ஆன்லைன் வழியாக செய்ய விரும்புகின்றனர். குறிப்பாக YouTube, Instagram, Snapchat போன்ற தளங்களில் அதிக நேரம் செலவிடுவது இவர்களின் முக்கிய பழக்கங்களில் ஒன்றாக உள்ளது.
Gen Z இளைஞர்கள் தங்களது விருப்பங்களை வெளிப்படையாக பகிர விரும்புகிறார்கள். வேலைக்காக மட்டும் வாழ்க்கையை செலவிடாமல், தனிப்பட்ட மகிழ்ச்சி, மனநலம், பயணம், சுயதொழில் போன்றவற்றுக்கும் முக்கியத்துவம் கொடுக்கின்றனர். இதனால் பாரம்பரிய வேலை முறைகளில் கூட பல நிறுவனங்கள் மாற்றங்களை கொண்டு வர ஆரம்பித்துள்ளன.
மேலும் இந்த தலைமுறையினர் சுற்றுச்சூழல் பாதுகாப்பு, சமூக நீதி, சமத்துவம் போன்ற விஷயங்களிலும் அதிக அக்கறை காட்டுவதாக ஆய்வுகள் தெரிவிக்கின்றன. எந்த விஷயத்தையும் இணையத்தில் தேடி உடனடியாக தெரிந்து கொள்வது இவர்களின் தனிச்சிறப்பாக பார்க்கப்படுகிறது.
அதே நேரத்தில், மொபைல் மற்றும் சமூக வலைதளங்களின் அதிக பயன்பாடு காரணமாக கவனச்சிதறல், மன அழுத்தம், தூக்க குறைபாடு போன்ற சவால்களும் Gen Z தலைமுறையில் அதிகரித்து வருவதாக நிபுணர்கள் எச்சரிக்கின்றனர்.
எதிர்கால உலகை வழிநடத்த போகும் தலைமுறை என்ற வகையில் Gen Z இளைஞர்களின் வாழ்க்கை முறை மற்றும் சிந்தனைகள் உலகளவில் பெரிய தாக்கத்தை ஏற்படுத்தி வருகிறது.
